لا زلتُ غارقاً في الطين - لحظة هروب جديدة

لازلتُ غارقاً في الطين 

5 يونيو 2021

‏من حوالي ﭼــم شهر مضن ﭼــنت مقيم بمدينة البصيرة (شرق ديرالزور، خاضغة لسيطرة قسد) طبعاً أنا نازح بمناطق شرق الفرات من أواخر العام 2017 ، ݘنت بهذاك اليوم برات البيت ورجعت حوالي الظهر، لقيت عجوز جارتنا تأشرلي من بعيد بيديها وتركض ناحي وتتحرف يمين ويسار .. !!

- شنو خالتي شنو بي ؟

- قالت انهزم يابا جو يريدونك وبعيونهم الشر ؟ (كانوا جماعة من مخابرات قسد) سألوا عني ودخلوا بيتي ونثروه وظلوا يدورلي بالحارة  ..

طبعا اني كنت مستأجر بيت بالبصيرة من حوالي سنة تقريباً واكثر، لأني نازح من الميادين من اواخر 2016- لاحقني داعش وطلعت بأعجوبة للشمال، ثم تركيا (شهرين) ورجعت عالدير على أمل تتحرر الدير ، هناك اخذ مناطقنا النظام، والجزيرة راحت لقسد .

- المهم دريت انو بي حدا بلغ عني، لان كان في بذاك الاسبوع حملة امنية ﭼــبيرة ،وݘان بي جماعة من جيراني شاكين بيا وبي واحد من ولدهم مع مخابرات قسد - مخبر .

- قلت للخالة كلشي اغراض ليا خذيهن عليكم، وان ما رجعت بعد يومين خذيهن لك، تانشوف شلون .. وسلمت ورحت مستعجل .. وشردت ..

امشي بين الزروع أريد ابعد بس عن المنطقه .. اخاف يكمشوني .. لانو كانوا يحومون بالحارة ع موطورات ..

ݘنت امشي والجو بارد وشتا كان وكتها.. والوقت قريب للمغرب وماني شايل الا موبايلي معاي ومتلثم بــ ݘراويه (شماغ اسود) ..

لمحت سيارة لقسد جاية من بعيد علي ، كنت بنص زروع ومنطقة خليه مابها بيوت ..

قمت فتت بزرع (حنطة) وانبطحت بيه بسرعة، ومن زين حظي كان الزرع مسقي .. !

وغطست بمي ووحل ، والجو بوز .. برد " شعور تجمد وكنت ارجف لغاية ما انعدم الاحساس عندي، وسياراتهم رايحة جاية".

اثاري صاحب الگاع (الارض) ساقي الزرع ورايح، الله يسامحه .. واني ݘطيت بيه ..

والحمدلله موبايلي كنت شايلو بيدي وما وصله مي .. بس كان بي بجيبي اخراج قيد ليا امشي بيه ومعاه 2000 ليرة سوري (كل ثروتي) .. (دولار ونصف). 

المصاري واخراج القيد - راحن بالمي وتنقعن .

المهم راحت السيارة ..الگشره .. 

وقمت واني مشرشح واشرشر مي وارجف .. والجو بوز وهوا بارد .. ولابس جاكيت وكتها مو فلت .. ݘنت مغطس بالوحل .. صرت كأني غريري .. (الغرير حيوان اسود اللون، كناية عن السواد والشرشحة بالوحل) :

قمت لقيت شجرة بطرف الگاع قعدت تحتها .. 

كنت متجمد من البرد .

فتحت موبايلي ردت اشوف بي نت هين ؟

حاولت اتصل بصديق لي كان بالشحيل، لعل اتواصل معاه يجي ياخذني لبيته بينما اضبط اموري. 

 شريحتي كانت MTN والتغطية كويسة عالفرات قرب المي، مدري ليش .. عند المي تقوى دوماً ..

فتحت بيانات وانها شغاله، تواصلت معاه وقالي تبشر نص ساعة اكون يمك ..

واني قاعد دخلت تويتر كنوع من ملئ الفراغ وتناسي البرد، وايدي كانت ترجف :

لفتتني تغريدة لبنت سورية عايشه بألمانيا وعليها الف اعجاب ومدري كم مية رتويت ..

لأنو كانت شقرة يمكن ولابسه حفر .. الله اعلم ..

عادة تغريدة بيها خبر عن طفل مستشهد او عيلة بمخيم،  ما حدا يقلبها .. عموما 

ازدواجية معايير حسب كلام المسقفين ..‏

المهم البنت تقول بالتويته: 

باركولي اخذت الجنسية الالمانية (حامله جواز الماني بيدها بالصورة) ويلعن الاسد .. مبروك لي ولكل الثوار الاحرار .. 

- اني هين والله وبصراحه ضحكت ضحكه مو طبيعيه وقتها ، حسيت حالي مجنون !! .. 

كنت مغطس بوحل وهدومي مي، وبوطي فردة راحت بالحنطة .. وفردة ظلت برجلي وتفق مي ووحل، ومطلوب ومهدور دمي على جانبي الفرات وعند النظام وقسد وعند اخوة المنهج تبع الخلافه .. وعايش برعب وماكنت اعرف النوم .. والله ! صح نازح بس كانت راحة البال مسروقة اخاف يعرفوني او يلقطوني !

- ضحكت هذيݘ اللحظة ضحكة هستيريه من قلب ورب .. مدري شلون !

انا هوية سورية ماعندي والله اخذوها الدواعش لما داهموا بيتي 2016 وبعدها هربت للشمال وتمرمطت وتبهدلت عحواجز الحر والنصرة وPYD قبلهم 

وبيني وبينكم حمدلله اخذوها ..

لأن صورتي بيها كانت تخوف .. كنت مربي شارب ..شارب الاخرس جارنا.. لدرجة ان شاربي كان ينسحب عليه قرض 30 الف دولار عقولة عمي الله يرحمه ..

ورطني بيه الحجي الله يسامحو ويشافيه .. كان يقول الشارب للزلم .. 

ومن دخلت الجامعه 2007 شلته وكفيته .. لاني كنت طالع شارب المكسيكي ..‏ 

المهم وبعيدا عن الشوارب كانت ضحكه مليانه قهر ومسخرة عوضعي يلي كنت فيه .

مطارد ومطلوب وماكل وحل (حرفيا) وحياتي ماعادت تسوى شي .. شريط حياتي مر من قدامي .. ايامي زمان، ودراستي وشهاداتي واصحابي يلي استشهد منهم، وهاجر منهم، وانفقد منهم، كيف كنت وكيف صرت ! من شخص كان يحاول ياخذ دكتوراه .. لمطارد ومهدور الدم .

كل هذا كان لسبب ولقرار تحملت تبعاته اني وقفت مع الحق، انو ثرنا على نظام قمعي مشان الكرامة، وحتى شعبنا وولادنا يعيشون بكرامتهم بدون ظلم مستقبلا .. 

وشقد قدمنا شهداء وشقد خسرنا 

صح اني حياتي ضاعت وعادي والله مو ندمان .. والحمدلله .. لان الحياة مبدأ .. 

كان قراري مثل قرار ملايين السوريين لارجعة فيه مثل عبور الروبيكون (كلمة بتاع مثقفين) ، ومصطلح كناية لقرار اللاعودة .

كنت اقدر اروح اوربا بسهولة واصير (ناشت ) بيها واطالب ان صبحه لازم تشلح حجابها لانو تخلف، وخلف ياخذ حمود ورا الدور ويتجوزه ومانقول انهم لوطيين لان هاي ادلجه ، وسعده لازم تترك جوزها حمد لانو سطحي وعديم ثقافه ويشتغل وگاف بالجمعيه وما يخليها تعبر عن رأيها ..

(وكاف: حارس عند جمعية فلاحية ).

ولازم نحدث الاسلام، ونسمع تفسير القرأن من ميمو مواليد 2007 عايش بهولندا اكتشف ان التفاسير هاي كلها غلط ، ويمكن نفكر نلغي الدين كله لان الاستاذ سطوف يلي عايش بالسويد اكتشف انو الاديان كذبه، لانو قاري كتاب من كم يوم يثبت هذا الشي بالادلة والبراهين، وهو كان موظف بالبريد بسوريا وكان يمه وقت يقرأ، بس لما وصل اوربا اندمج وفهم الحياة !!!

عزيزي الناشت والناشته يلي عايش بالغرب وتحتسي القهوة بكوب يمكن ..

 لما طلعنا ثورة .. وراحت هالشهداء والشباب مثل الورد، وفي منهم معتقلين، وراحت بيوتنا وتهجرنا، ونسوانا بالمخيمات، واهالينا نازحين واطفالنا اغلبهم بمكبات الزبالة يدورون عنايلون ليبيعوه مشان يأمنون ربطة خبز .. وفي عيل خبز اليوم ماتلاقيه وهم 80% من الشعب اموات ويتحركون من قلة الموت .. زومبي .. 

عزيزي وعزيزتي .. اذا انت ربك يسرلك ووصلت اوربا وامريكا وكندا .. 

خلاص عيش انت الحرية الغربية وطبق افكارهم عولادك واخواتك .. ولاتعصب يابا اذا واحد سوري منتوف مسلم او مو مسلم ما عجبته افكارك الغربية العصرية .. تبع المثلية والالحاد ومعاداة الاسلام .. الخ .. 

انت حر برأيك ، ولكن لاتتجاوز حريات الاخرين .. لان مجتمعاتنا قايمة عالدين نعم ..وشعبنا عندو محرمات وخطوط حمر .. وادب واخلاق .. هكذا نحن .. 

في سلبيات ايوا وݘثير .. بس طبيعي مافي شي كامل بالحياة ، وتصنع المثالية الدائم مقرف .. 

اذا انت عاجبتك المثلية تجوزلك فحل وانبسط ..وانتي كذلك عزيزتي خذيلݘ وحده ومبروك ي عيني .. 

بس لاتفرضون افكاركم العصرية بمنظوركم وتسقطونها علينا .. لان نحن اخر شي نفكر فيه هالقصص والله .. 

سيادتو وفخامة القادة والشيوخ والهافلات مكفين وموفين ..

اندمجوا بمجتمعاتكم لانو 99% ماراح ترجعون اكيد .. انبسطو .. ولا تشبحون علينا .. لانو قرفنا تشبيح والله ..

الساروت وابو فرات وغياث مطر والبورداني واطفال درعا، وغيرهم .. ما طلعوا مشان هالسوالف التخانه .. 

طلعوا ضد نظام قمعي .. ظالم .. عنصري ..

 لاجل الكرامة خرجنا ..

لاتشبحون .. وتقولون نحن متخلفين .. والحرية لا تتجزأ كالبيضنحان، حريتكم واهدافكم شي، وحرية شعبنا شي وهي اسمى لاننا نزرح تحت قمع وموت وفقر وقصف يومي وظلم وقهر ..

المتخلف هو يلي ينافي طبيعته ويقلد بشكل اعمى وعنده قرار فقط اتباع اعمى ..لاي مجتمع يطب بيه .. لانه اساسا خالي واجوف ..

رأيك انت حر فيه .. لكن احترم رأي وخصوصيه غيرك ..

ماراح اقولك اهتم بقضايا بلدك وشعبك . . لان اتصور غالبا ما عاد يهمك .. فقط شغلتك انتقاد وتوزيع نصائح عميقة :/ 

تانشوف تاليتها شني ..‏تمنيت تعيشون التجربة السورية عالواقع، وتشوفون شلون الناس مو لاقيه خبز ولامي ولا كهربا ومحد فاضي يفكك الادب التشيكي ويحتسي قهوة لانها ما تتقارب غاليه ، وشلون القتل يومي ، والتفجيرات والاعتقال والظلم، لك حتى الفرات واقف وميته بطعم النفط .. والهوا سم، وكورونا تقتل يومي ..

اندمجوا وشكاركم بينا ..‏او حاولوا تجون هين واشرحلونا افكاركم .. :)